ديوان عبدالله الدواس

أستعيذ بقوة الله من ( وساويس الرجيم )...=والغنا والكبر والتغرير وعيال الحرام
ضاقت الأربع جهات وشنت ياجو القصيم...=ضيقةٍ والله ماهي مثل ضيقة كل عام
البحور تحدني والقاع يلفظني وأهيم...=وإن تصعدت السما زادت علي الإنكتام
أركب الموتر وأقلب باأشرطة عبدالحليم...=وأزهم الهاجوس وأسري عقب ماآتك الحزام
وأترك الديرة خلافي شاقية والجو غيم...=وآتنقى لي طريقٍ خابره مابه زحام
وهات ياقوة هواجس بين ظيم وبين ظيم...=ولو تنهدت الله أعلم كان بكيت الغمام
أمسك عروقي من أول عرق في صدري سليم...=ثم أفصفصها ولاآقف غير في وجه العظام
يلعن أم الحاله اللي كنها ( حالة يتيم )...=لاصحى ( وجه المدينة ) لحف همومه ونام
مهطعٍ مقنع وطرفي وين أمده والسديم...=حايلٍ بيني وبين الدرب والدنيا عتام
شق عيني والعزاري يشربني شرب هيم...=وإن نشدني واحدٍ وشلون ... !! ( قاطعته ) تمااااام
خابرٍ لو قال ( حالك ) كان والله العظيم...=تنفجر عيني ويالله عاد يقلبها ملام
أصبح بصدري جحيمٍ وأمسي بصدري جحيم...=عفت ربعي كلهم وشلون ماآعاف الطعام !!
شاقيٍ ماأشقيت نفسي بالملذه والنعيم...=أدرج لي في بياحٍ مابها غير الهوام
ألتحف باالبرد وأشرب وحشة الليل البهيم...=كل ذا من حظي اللي مايعرف إلا ينام
وش خذيت من المواجع غير هالصوت الرخيم...=نبرةٍ ماتنبع إلا من صميم الإنهزام
سوء حظي والأماني وآآآآخر العشق القديم...=خلفت بي هاجسٍ ماخلفه ( زلزال بام )
وش عزاي إلا إني أسجد وأرتجي رحمة رحيم...=وأستعيذ بنور وجهه من غثا ( لو ) ( كان ) ( دام )
والله إنك جبتها ياحزام راسي بالصميم...=والله إنك عاد تستاهل على ضحكك وسام
صاحبي ماني غشيمٍ وأنت ماخبرك غشيم...=تدري إن لا ديني ( أ ) ولا دين تكثير الكلام
أنت تبخص ويش أنا بالضيق و( الخطب الجسيم )...=وأنت تبخص باإحترامي كان جت للإحترام
أكره اللي راي راسه يلعبن فيه ( الحريم )...=يصبح بـ ( شالت مرام ) ويمسي بـ ( حطت مرام )
خلنا لاهنت في ( إن أنت أكرمت الكريم )...=مالها داعي نجي للؤم وعلوم اللئام
يعني الله لايهينك ( كالصراط المستقيم )...=صاحبك لاني وزير ولاأنت ياعمي غلام
مايعرف العشق رجلٍ ماغرق بعيون ديم...=ومايعرف العز قلبٍ ماشرب كاس الهمام
والله إن لعيون كهلٍ من ورى حدبي حليم...=قلت ياضيقه سلااااام وصارت الضيقه سلام
جيتني ( بالسين ) وأبشر يابعد حيي ( بجيم )...=نصه أن ( ياسيدة .. ياآنسة .. أو يامدااااام )
لا وأنا اللي باإصبعٍ واحد تحرك لي تميم...=لابةٍ لاقام واحدهم وراه الكون قام
والله إن تبطي ويبطي كل ( كذابٍ أثيم )...=مابقى إلا عاد نلعب مع ( خفافيش الظلام )

سلم على الديره اللي في عمايرها...=ربعي بني عم نبض القلب وجداره
الديره اللي من أولها والى آخرها...=من دونها اقف وقوف الزير في ثاره
ويوم العرب باالكرم تذكر مفاخرها...=جيت اسرج الشعر لااجلك وانفض غباره
حي المساجد وحي الله منايرها...=وحيا حرم مكه الله يحفظ اسواره
وعل السحايب تطلق من زرايرها...=وتخفض جناح الوفا من فوق الإمااااااره
وسط الرياض الله الله لايكدرها...=والله يحيي نباها حارةٍ حاره
ومني على راس قايدها وعامرها...=فهد وريث المراجل بوسةٍ حاره
اللي حماها وحاما لين طورها...=وطور بعد في قلوب الناس مقداره
محبتك مااعرف وشلون افسرها...=بس الوكاد انها بالقلب ديَاره
فينا عزايم عسى الله لايفترها...=وفينا طموحٍ شلع مشلاع طياره
ناقف مع الجار والجيره نقدرها...=ولا خير في جار يرخص من غلا جاره
لو الجنايز تنفج من مقابرها...=يبقى السعودي كريم ويفدي دياره
تبت قلوبٍ تخلت عن ضمايرها...=إعقول منحرفةٍ وايدين جزاره
اللي عثا ابليس في حسبت سرايرها...=وقامت على المسلمين توجه الطاره
ثلة ظلالٍ عسى الله لايكثرها...=كم مسلمٍ مات من تفجير سياره
يالله عليها عسى ترجع ذخايرها...=ماللغدر عندنا يااخوك كفاره
كم من عجوزٍ تعزر من عبايرها...=وكم شيخ شبت ظلوعه من لظى ناره
الانتحارات هذي وش يبررها...=الدين منها بري وطاهر اطهاره
يالله وامانك هل الارهاب تظهرها...=وتجبر عزا قلب حيٍ شقوا إزراره
الكفر في بطنها (والطوع) ظاهرها...=والحق بين ولا يحتاج له شاره
والله يحشم اللحى من مايغبرها...=والله يجز العميل وينهي ادواره
والله يقطع هل الفتنه ودابرها...=ولا عاد نسمع عن الارهاب واخباره
حنا ( فشق ) والوطن من وين سيرها...=نشنها غارةٍ تلحق ورى غاره
فينا طبيعه ولا والله نغيرها...=نفز للدار فز الجار للجاره
والمملكه من غلاها لو نسورها...=بصدورنا من كبار القوم لصغاره
ماعاد نلحق جزا شيخٍ معمرها...=اللي على اشبار غيره تافي اشباره
ودام المساجد تردد في مكبرها...=(( الله أكبر )) فــ .. (( حنا )) بخير وبشاره
وتبقى العصي لو تجمع مايكسرها...=فعل الخوارج ولا تقريضة الفاره
أفداك ياالديره اللي في عمايرها...=ربعي بني عم نبض القلب وجداره
الديره اللي من أولها والى آخرها...=لعيونها اقف وقوف الزير في ثاره

حلهـا لاقفلـت والقـاف عاصـي...=شـح جعلـه للعمـى حتـى بموشـه
إن حكمت الهاص قال الهاص هاصي...=وإن طلبتـه قــال والله ماتنـوشـه
ذا وأنا أول بس كنت أبغى خلاصي...=من غثاه ومـن بـلاه ومـن جيوشـه
مير يوم إن الشقا صار إختصاصـي...=قلت أبلعن خامسـه وأكسـر وحوشـه
لادنا لي كـل أبـوه بـدون قاصـي...=قلت ياعرشي وكـل(ن) لـه عروشـه
وش بلا بعض العرب قامت تصاصي...=تلمـس العسجـد ولا تقـدر تحوشـه
هم لهم بالطير وجيوب الشواصـي...=وش لهم بالعد يـوم أغـدوا طروشـه
يضعف الإيمان وتزيـن المعاصـي...=والردي يشري عذابـه فـي قروشـه
يالله إني عبدك اللي جـاك ناصـي...=رحمتك ورضاك عن ( ضنك المعوشه )
( الكبد ) ثور على صدري رصاصي...=والغضي لاأقفيـت جابتنـي رموشـه
من طناخة هامتي حتـى خماصـي...=مستلمني الغي مـن هوشـه لهوشـه
آتربـص ميـر مافـاد ارتباصـي...=ماقفـل عقلـي عليّـه بـاب حوشـه
وأنت إلآهـي ياإلآهـي يامناصـي...=جيت لـك نفسـي تـرزم ومخروشـه
مانصيت إلا أنت يـارب النواصـي...=باد حيلي والزمـن شاخـت جحوشـه
أختبص وإبليس معجبه إختباصـي...=نافـثٍ باإذنـي وعينـيّ إمغشـوشـه
قدني للحق لعـوز بـي إخراصـي...=وأعطني ثقـلٍ علـى نفـسٍ بشوشـه
فكهـا لاقفلـت والقـاف عـاصـي...=قدنـي خيـره وطـوع لـي وحوشـه

ياصاحبـي / مشكـور مشكـور لاهنـت...=والله يجـمـل حــال طعنـاتـك الـسـود
العام لامن غبت / صوت ويـن انـت ؟!...=واليـوم ماتشكـل علـي / وانـت موجـود
الحـمـد لله ب..أول الـوقـت بيـنـت...=(( وجه الحطب )) / بين ردى ريحة العـود
غفلت عنـك شـوي / ولحظـة تمكنـت...=ثـورت بيـن كتـوف / صاحبـك بـارود
الله لـو تـدري بعـد قبـل وش كـنـت...=لـو تـدري بكثـر الغـلا / مـت ملهـود
كنت الظهـر / والقـاك لامـن تيامنـت...=وكنت المثـل باالطيـب والصـدق والجـود
انت اكثر انسـانٍ علـى وحدتـي منـت...=وكنت اشتكي لك من قسى / " شيخة الخود "
ويامـا علـى عسـر الليالـي تعـاونـت...=معك وعطيتـك كـف / مفـروش بـورود
اقسـم ورب البيـت / لامـن ماتسننـت...=ادعـي واقــول الله يعطـيـك ويــزود
كنت اتمنـى الخيـر لـك ويـن مابنـت...=وامشي معك / لـو درب ممشـاك مسـدود
لااجلك علـى وجـه الصعيبـات مالنـت...=وفتحت لـك صـدرٍ عـن الغيـر مـردود
لـو شانـت بوجهـك / لياليـك ماشنـت...=اقف ولـو وجـه السمـاء بـرق ورعـود
يامـا تكلـم فيـك شـامـت وبرهـنـت...=انـك ولـد ذيـب / ورجاجيـل / وفهـود
وقفـت فـي وجـه المعاديـن واعلنـت...=انـك بوجهـي..وانـك الـيـوم مسـنـود
علـى كثـر ماآمـنـت بالله / آمـنـت...=انـك يمينـي لاقسـى الـوقـت وزنــود
واليوم (افا) ياصاحبي / بعتني ف..بنـت...=وهديت صـدرٍ / قبـل ماجـااااااك مهـدود
على العموم ان رحت وان جيت تبقى انت...=اكبـر دليـل ان الوفـا صــار مفـقـود
ياصاحبي / مشكوووووور بالحيل / لاهنت...=والله يجمـل وجــه طعنـاتـك الـسـود

غربتي والسكة اللي / عاندت وقـت الرحيـل=والبدايـة والنهايـه / والـزوايـا والـعـذاب
وانت ياذيبٍ تحيزم / وانزوى بااسـم الخليـل=شفتكم والصوره اللي تنعكس " صورة ذباب "
ذيب وقف ما تفكر؟! ذيـب وقـف / ياهبيـل=كيف تاطى وانت ماطى لد عينـك للسحـاب
ذا مكاني لو اعاني / لـو احـس انـي ذليـل=فوق طاقة مخ راسك / ياسراب ٍفـي سـراب
فوق عرشي تحت فرشي لااحمد اطباعك مقيل=فيـه منفـى للذيـابـه/ ياذيـابـه يـاذيـاب
كلهـا تعوذيتيـن وبسـمـلاتٍ(ن) وتهلـيـل=واغرقك بالبحر الاحمر / وادفنك وسط التراب
ايه طفل(ن)ٍ علمتنـي دنيتـي حمـل الثقيـل=ماطردت وقمت ادور فـي ملـذات الشبـاب
والله اني لاضواني ليـل ليـل افبطـن ليـل=يرتكز صدر ي صلابه وارتكي فوق النصاب
قالت امي ياوليـدي / لجـل عينـي لاتميـل=لاتميـل الا بركـوع ٍ بعـد فاتحـت الكتـاب
قلت انا لعيناك يمه / لااجدل عروقـي جديـل=ولاكسر انياب الرذيله ناب يمـه نـاب نـاب
بمسك ازمام الوصية واقطع الـدرب الطويـل=وبفتحه من نور وجهك / باب يمه باب بـاب
مملكت قلبي هنوفٍ(ن) / يوم جتنـي تستميـل=قلت صدي بس صدي بس / يامـال الذهـاب
من قرصه العشق الاول مايبي غيـره بديـل=خبل انا تبغاني افـزع كـل ماشفـت النقـاب
مات طفل الشوق فيني / وذبحه حـد السليـل=والسليل اللي ظلمني / مادرى عنـه الجـراب
جيت ابثبت كيف ابثبت؟! اختفى حتى الدليـل=وامسحت سود الليالي دم طفلـي والخضـاب
وارحلت من بعد قالت : " يابعدهـم لاتخيـل"=قلت يعني غاب قصدك؟! قالت ايوه غاب غاب
قلت دربك للسموحه لألف ميل ولألـف ميـل=وبزرعك في وسط صدري حلم يابنت الضباب
وبذكرك مادمت حي ودام باقـي فـي حيـل=وسامح الله كل ذنبٍ / منـك ياسـت الغيـاب
وياعسى تجدب فياض الشوق عقبك مايسيـل=واديٍ كنتي ربيعـه / يابعـد غـدر الحـراب
وارحلت بااسم النقاوه / عزت القلـب النبيـل=واهشمت حدب الضلوع وقلبهـا بالشـوق ذاب
كن قلبي مصر واصبح جرحها والوقت نيـل=جننتني بالموادع / ليـن جمـر الليـل شـاب
لاموانـي / لاشواطـي / لاكثيـر / ولاقليـل=انكسر وجه المرايـه وانـزوى بالقلـب داب
واحترق فحوى الرساله راح جيل وراح جيـل=واندثر قبـر المـوادع واعتزلـت الاكتئـاب
بعدها والسكة اللـي عانـدت وقـت الرحيـل=والبدايـة / والنهايـة / والزوايـا والـعـذاب
وانت ياذيبٍ تحيزم وانـزوى بااسـم الخليـل=شفتكم والصورة اللي تنعكس " صورة ذباب "

واقلبي اللـي يـدك الحـزن بعروقـه...=جان الخبر وارتجفت وهـزت اعماقـي
وياوجد حالي وجود مضيعـن نوقـه...=والا وجـود العديـم الشاحـب الشاقـي
عيني تحايل علـى المرقـاد وتبوقـه...=وافز..كن اللظى يصلـى علـى ساقـي
يانفسي اللي مـن الغربـال مرشوقـه...=تصبـري ياعسـى الله يفـرج خناقـي
يقوله اللي يكث الضيـق فـي موقـه...=يالله عسـى الله يصبـر والله الـواقـي
يالله ياسايـق المـرعـود وبـروقـه...=طالبـك يالله تجبـر كـسـر خفـاقـي
حكمك قـويٍ ولا بـه شـيٍ يعوقـه...=الهمنـي الصبـر شـد الحـزن بوثاقـي
الحزن الاقشر يحيط العين في طوقـه...=كـن المدامـع تهـزع داخـل احداقـي
ارحم فقيدٍ يباع الطيـب فـي سوقـه...=عد الغـروب وعـدد مايطلـع اشراقـي
ولفه بريحان من تحتـه ومـن فوقـه...=وسـع لـه القبـر يارحمـن يابـاقـي
والكوثر العـذب بيـده خلـه يذوقـه...=لامـاورى مـن شقـا الايـام ماذاقـي
هذاك " جدي " واعرفه وابخص بشوقه...=شوقـه بجنـة عـدن وعيونـه تهاقـي
يالله ضيفك وضيفك مايبـي حقوقـه...=ان عمتـه رحمتـك ماهـمـه البـاقـي

ياطير قم ود اشقر الريـش مرسـال...=وعـود علـي بسـاع منـه برسـالـه
رح (( للسبيل )) وانشده كيف الاحوال...=وان جيت قلي مسنـدي كيـف حالـه ؟!
ياطير تاخذ لـك معـه بـس فنجـال...=وان كـان لـزم خـذ بعـدهـا بيـالـه
ماهو قصور(ن) فيه خابـره رجـال...=ورث المراجـل و (ا)ورثوهـا عيـالـه
لامن سكت حكمه..والا قـال ماقـال...=ياكـود هـرج(ن) فيـه نبـل وجزالـه
عقيـد قـومٍ شوفتـه تشـرح البـال...=ذرب اللسـان وتــاج راس الجمـالـه
لـولاي كلمتـه كـذا قبـال بقـبـال...=لااقـول ذا يااخـوك يقـرا " مقـالـه "
ويوم ان بالهرجه سمينـات وهـزال...=هـرج (( السبيـل )) لاتـدور بـدالـه
خذ له سلامي عد مـاوادي(ن) سـال...=وعـداد مابالمملـكـه مــن بطـالـه
وعداد لازل الشهر مصـرف ريـال...=وعـداد جمـس(ن) ينعـرض باالوكالـه
وعـداد ماترسـل مراسيـل جـوال...=وعـداد مـاجـت للخلـيـج العمـالـه
للشاعر اللي لا كتـب يكتـب اهبـال...=وتشهد له ابيـات الشعـر فـي جمالـه
لامـن نـوى ماعـاد ياكـود بثقـال...=كـامـل ولله المـثـل فــي كمـالـه
قافـه يهـز بقوتـه بيـد وجـبـال...=حتى غدى بالشعر (( صاحب جلالـه ))
قله عسى لـك حولنـا بـس مدهـال...=ولا يستـحـي ماعـنـده الا حـلالـه
وقله تـراي مبهـر(ن) خمسـة دلال...=وحتـى الـدلال اليـا بغـاهـا دلالــه
وان كـان رده دوننـا بعـد الاميـال...=نكـز لـه مـن هـو يجيبـه لحـالـه
وان كـان شفتـه بالمعاذيـر يحتـال...=قلـه وابــن دواس مـاضـاق بـالـه
الفـال طيـب بـس ياطيـب الفـال...=اللـي نعـزه ننشـده كيـف حـالـه ؟!
(( وياابن سبيل دق لو بـس جـوال...=وان ماقدرت ارسل ولو هـي رسالـه ))

يالله يامنـزل تـبـارك والانـفـال...=يسـر علـي اللـي صعيـب منـالـه
عذب البيوت اللي جميلات وجـزال...=الشعر000ماتطـري عليـنـا هـزالـه
رد على اللـي بالوفـا والادب نـال...=أعلى المراتب00 وإشتهر مـن خلالـه
الشاعر اللي كان شعـره00 ولازال...=يلفـت نظـر مـن سمـع وإلا قرالـه
عبدالله الدواس مـن طيـب الافعـال...=اللـي ورثهـامـن عـمـام وخـوالـه
عاقل وله في ساحة الطيب مدخـال...=قـدره رفـيـع وطيـبـات خصـالـه
يامرحبـا ترحيبـة مالهـا أمـثـال...=من قلب 000 فيه الكره مايـوم شالـه
قلب لحـب النـاس ملفـى ومنـزال...=والحمـدلله حــب الأجــواد نـالـه
شرواك وأنت بدون تشكيك وجـدال...=رمـز الكـرم والمرجلـه والشكـالـه
طيرك وصلني عجل والظل مامـال...=سلـم000 وسلـم دعوتـك والرسالـه
لكن حجزت الطير في فـيّ وظـلال...=فـي مجلـس خبـرك بوسـط الحيالـه
بغيت له عقب التعب طيـب مقيـال...=وقدمت له ماطـاب واللـي طـرى لـه
لا00لاتلومـه بالتأخـر والامـهـال...=ماجـت لـه الدنيـا عـلـى مابـدالـه
الضيف ماسير علـى نـاس جهـال...=والى وصل يمشي متـى ماطـرى لـه
ومدحك فخر ياذخر من شاف الاهوال...=مـن ضيـم دنيـاه وتـردي حـوالـه
وزيارتك فرض علي مابـه إشكـال...=هـذا شـرف ياسعـد منهـو ينـالـه
وأبشر بمسياري ترى القلـب ميّّـأل...=ويطيـب فـي قـرب الأجاويـد فالـه
وأشفق على اللي يرسل علوم ويسال...=عني00 من المفروض أجـاوب سؤالـه
ماهمنـي واشـي وحاسـد وعـذال...=أهـل الـهـروج المايـلـه والنـذالـه
وأقبل تحياتي والأشواق000 يامـال...=العافيـه000 ياصاحـب ينعنـى لــه

لا والله الا راحـت بخافقـي سـت=ان كان ما هي بنت تاجـر.. اميـره
قالت : قريت اسمك على ساحة النت=شاعر وتاقف لـك جمـوع غفيـره
قلت : ارحمي حالي ترا خافقي شت=مثلي بعشقك ويـن يلقـى مصيـره
من شفتك البارح وانا ما بعـد بـت=اجمع شتـات الذكريـات الاخيـرة
من يوم جادلها علـى متنهـا كـت=واستلهمت يمنـاي ظافـي حريـره
صاحت ظلوعي للقلم والورق حـت=وطارت عصافير الخفـوق الكثيـرة
حمرا شفايفها تفـت الحشـاء فـت=وعيونهـا بـوح البحـور الغزيـرة
وشلون ابطلع من ذهولي وانا كـدت=أذوق طعـم الشفتيـن الصغـيـرة
أول سؤالٍ قالته : بعـد مـا جـت=من هي فتاة الليموزين المثيرة ..!!؟
قلت بجراءه ما ارتبكـت وتـرددت=شكل السؤال اللـي تقوليـن غيـره
حاولت افهمها وش الوضـع واثبـت=ان القصيد اية .. ( مره ) .. تستثيرة
قالت ابي تكتب قصيـدة علـى ات=قلت ابشري يا نور شبـه الجزيـرة
الشعر روحي لا سهـرت وتوجـدت=وانـا بعـد سابـر خفـاه وسفيـره
واعتقت بالـي للهجـوس وتكبـدت=ليل الشتاء يـا وحوحـة زمهريـره
تصرخ خفايـا خافقـي لا تنهـدت=وابـوح للبحـر الغزيـر السريـره
واذا خذتني سـود الايـام وانقـدت=اسهر على جال القصيـد وغديـره
اعيـش لـذة عالمـه لا تـشـردت=لانه بقلبـي ويـن مـا اروح ديـره
يا ست انا بالهم غارق ولـي سـت=سنيـن والوقـت ايحرمنـي عبيـره
انا تغربلت .. وشقيت .. وتوحـدت=اصـارع احـوال الحيـاة المريـره
مع سلهمت عينك غرقـت وتبـددت=بين الحياة وضحك طفلـة غريـرة
لكن بعد مـا جيـت يمـي تأكـدت=اني معك عمـى عيـون وبصيـرة
معاك مهما سافـر الحلـم وابعـدت=تبقـى مشاويـر المحبـة قصيـرة
مدامني يا سـت عايـش ولا مـت=مانسى شتـات الذكريـات الاخيـره

ياقلـب ياقـلـب العـنـا لاتشـتـت...=قـل ياعسـى بالامـر ياقلـب خـيـره
ياسعود ياافضل من على ساحة النـت...=اشعلـت بالخفـاق يـااخـوك حـيـره
ياللي تقول بخافقـك راحـت السـت...=ماللهوى ياسـيـد الـشـعـر ديـــره
مرن علـي ياسعـود عاميـن مابـت...=وشلـون ابـات ونـار جوفـي سعيـره
قالت دخيلك (( فوت )) وشوي من فت...=بعـت لسـواد الرمـش قـوم وعشيـره
لين احلفت لي قالـت انـك توحـدت...=فـي مملكـة قلـب الغـرام وغـديـره
اموت ويبعثنـي الهـوى كـل مامـت...=بعيون مـن هـي فـي عذابـي جديـره
ماذوقتنـي بالهـوى غيـر هاالسـت...=المـوت والحرمـان واسلـوب غـيـره
وطعون رمش وهـم كـل ماتباغـت...=ورد الثغـر واحـلام لـيـلٍ قصـيـره
معها ملكـت الكـون حتـى تمـردت...=ومنهـا عرفـت اشـيـاء والله كثـيـره
يعنـي بجـد بجـد يااخـي تبـلـدت...=وخليتها بمكتـب خفوقـي (( مديـره ))
مشكلتـي انـي بالغـلا ماتـركـدت...=خبـل وعطيـت القلـب بنـتٍ صغيـره
لاجيت صدتني ولا رحت هـي جـت...=ولامـن صملـت بجـد جتنـي كسيـره
ياسـعـود لاياسـعـود ياماتفـتـت...=اوااااااااه لاياسعـود ياهـي (( دميـره ))
((شعر التوجد)) يوووووه ياما توجدت...=وجـد الـذي لاضـاع ياسعـود طيـره
بالمختصـر ياسعـود يعنـي تشتـت...=وقمت اسمـع لشمـس ونـوال وسميـره
مشكلتـي انـي بالعقـل ماتسـنـدت...=قلبـي خضـر وغصـون قلبـي وثيـره
ياسعود هيضنـي كلامـك علـى ات...=كنـك فتحـت لسلـوت القلـب سـيـره
اكذب عليك ان قلت ناسيه بس كـدت...=انسـاه دامـه حـل بالقـلـب غـيـره
الله يحلـه عــد ماهـامـل حــت...=وعـداد مـاهـزت يديـهـا الظفـيـره
ياسعود كان بخافقـك راحـت السـت...=ف..انـا خـذت قلبـي فتـاةٍ غـريـره
هيضتني ياسعـود ليـن انـي ابعـدت...=ماكـان انـا قصـدي افـض السريـره
صحيح انا قد قدت بالحـب وانقـدت...=وقد كـان لـي بالعشـق درب ومسيـره
ياسعـود انـا بنشـدك وياماتـرددت...=ادرى السؤال بوسـط صـدري واديـره
لكـن فرصـه يـوم شفتـك تنهـدت...=والكـسـر عـيـا لايطـيـع الجبـيـره
بسأل مثل ماهي سألـت يـوم ماجـت...=مـن هـي فتـاة الليموزيـن المثيـره!؟

الديره اللي مافرق فيها الوليده والكديش=لابارك الله في وليدتها ولا كديشها
يما نعيش بعزنا والا عسانا مانعيش=وش بالحياة الفانيه يغري عشان نعيشها
ياليت مالي منبض لاهبت الذكرى يجيش=وياليت عيني تحترز بالله وتترك طيشها
والله ياها المضغه اللي بين حدبي ماتبيش=أدنات خصر يتلها مني وينتف ريشها
بعد السلام ومايلي يصل الى يد الشاويش=بالديره اللي شعبها يضحك على شاويشها
يالمحترم خلك على مانتب عليه ولاتطيش=لاتاكل لحوم العرب مادمت تاكل عيشها