ديوان عابرة سبيل

ش ا قول له ؟

باكر يجي 00 يا شيب عيني من الويل
من عقب مـا سافـر سنيـنٍ مديـه

ش اقول له 00 صاروا عيالي رجاجيل
ش اقول له ؟ 00 ماني بعهده وفيه ؟

إن قلـت لـه إنـي تعذبـت بالحيـل
و إن قلت لـه أكبـر عيالـي سميـه

يبي يعذرني و يتـرك القـال والقيـل
و لا يجـي ويـا زمـانـي علـيـه

و ان جبت حظي و المقادير 00 تعليل
و اني ضعيف 00 و رغبة الله قويـه

يبـي يصـدق كلمتـي دوم تحلـيـل
و لا يبـي ينسـف كلامـي عليـه ؟

ش اقول له ؟ 00 ما ينفعن الاقاويـل
ما دمت مانـي فـي وعـودي وفيـه

لحظة وداع

فارقـت خلـي و كـلٍ ودع الثانـي
لا عـادك الله يـا فرقـا المحبينـي

في ليلـة السبـت خليتـه وخلانـي
يا ليلة السبت جعلـك مـا تعودينـي

الصاحب اللي عقب مـاراح بكانـي
و هو بعد قبل مـا يمشـي مبكينـي

سابع سنة حبهم عايـش بوجدانـي
طموح و احلام ماتن ، من يعزيني ؟

و الله مدري انا ابكي بعـد خلانـي
و لا على عمري اللي راح وسنيني ؟

عنده رقم هاتفي و اسمي وعنوانـي
ان غير الوقت رايه 00 يتصل فيني

اللي خلاني انصدم واصيح واصارح
فرقـاه حتـى خيـالٍ مـا تخيلتـه

وا جرحي اللي من الافكار يستارح
وا قلبي اللي من الاوهـام حملتـه

يا كثر شعري

يا كثر شعرٍ كتبته امس و البـارح
و يا كثر شعرٍ عقب فرقاه سجلتـه

دفاتري إمتلت من سبـة الجـارح
هذا000 وغير الذي للحين ما قلته

خلى دموعي تهل و خاطري سارح
يا كثرٍ همٍ عليـه اليـوم شايلتـه

قال الوداع

هو يعتقد لو راح مقدر انا اعيش
دايـم يهددنـي بفـك الجموعـي

قال الوداع , وقلت يا صاح حتيش
يا علهـا فرقـا بليـا رجوعـي

لا تعتقد من سبة البعد يا طيـش
يا صاحبي حبي على كيف طوعي

يا سايل عني انـا قاسيـه ليـش
بتموت ما تلقا مع الناس نوعـي

كف الرسايل لا تـدز المطاريـش
سكرت عن هرج الوسايط سموعي

إنــــــا للـــــــــه

لـيـتـنـي الـبـارحـه يــا نـايـفــه مــا سـريــت
يــم درجٍ مـقـفــل مـــن قــديــم الـسـنــيــن

أشـهـد انـي فـتـحـتـه و انـتـبـحــت و بـكـيــت
شـفـت مـا هـيـض الـجــرح الـقـديــم الـدفـيــن

شـفـت وسـطـه رسـالـه و لـيـتـنـي مــا قـريــت
بـيـت شـعـرٍ قـديــم و ظــرف مــع صـورتـيــن

أشـهـد انــي لـغـيــره بـالـغــلا مــا عـطـيــت
و اشـهـد انـه بـغـانـي مـيــر مــا مــن عـويــن

صـحـت مـن قـلـب يـا ويـلـي عـلـى الـلـي هـويـت
و قـمـت امـس دمـوعـي مــن يـســار و يـمـيــن

لا طـرالـي حـبـيـبـي بـصــوت واطــي حـكـيــت
إنـــا لــلــه وإنـــا لـلــولــي راجـمـعــيــن

حــــان الـــــوداع

حـان الفــراق .. وتم توديع غاليـــن
قسـوة زمن وظروف ماهي رحومه

وحـاولت ابدّل موقف العسـر باللين
وأبـــيــــن قدامه جسور ظلومــــه

و أعاتبه وأنقد على دمعة العيــــن
وانــا - حشا لله - مانـــي ألــومه

و أقول هذا حال كـــل المحبيــــن
وهذا الفراق اللــــي تجينا علومه

ومسكت نفسي كن ماصاير شين
أخشى على خلي يشقق هدومه

ثم قلت وش تنطر حبيبي لهالحين؟
أثر ايديني ماسكات كمـــومه ؟؟؟؟

العيد باكر

العيد باكر ...... أسعد الله ممساك


والله مدري ويـن خـدٍ جلستـه


وين أنت ياللي عيدنا في محيـاك


كف القدر من ضيقة الخلق بسته


من يوم ما لوَحت لي كف يمنـاك


لليوم دمعـي بالخفـا ماحبستـه


ومن يوم ماذوقتني حـر فرقـاك


والياس زرعه في حياتي غرسته


شريت ثوبِ علـى شـان لقيـاك


والثوب راحت موضته مالبستـه


وشريت عطـرِ مازهانـي بليـاك


أربع سنيـن بعلبتـه مالمستـه


ودفتر قصيدِ كـل يـوم يترجـاك


مافيه يـومِ ماسهـرت ودرستـه

وصيـــة على فراش المــــوت

ترى الذبايح و أهلهـا مـا تسلينـي
أنا أدري إن المرض لا يمكن علاجه

أدري تبي راحتي لايا بعـد عينـي
حرام ما قصرت يديـك فـي حاجـه

أخـذ وصاتـي وأمانـه لا تبكينـي
لو كان لك خاطرٍ مـا ودي إزعاجـه

أبيك في يديك تشهدني وتسقينـي
أمانتـك لا يجـي جسمـي بثـلاجـه

لف الكفن في يديك وضف رجليني
ما غيرك أحدٍ كشف حسناه واحراجه

أبيك بالخيـر تذكرنـي وتطرينـي
يجيرني خالقـي مـن نـار وهاجـه

سامح على اللي جرى ما بينك وبيني
أيام نمشـي عـدل وأيـام منعاجـه

همي عيالي وأنا اللي فيْ ..كافينـي
علمهـم الديـن تفسيـره ومنهاجـه

لاتسافر

لا تسافر وتتركني أجاهد غلاك
كل شي يهون إلا جهاد الغرام

أما تبقى معايا أو اسافر معاك
لاتخليني لطوال الليالي طعام

خوفي البعد لامنه خذاك وطواك
مثل قصر تولاه الزمن والهدام

لاتسافر وانا اللي في رجاالله ورجاك
لا تسافر و تلقاني بقايــــا حطام

هيـّا تغــزل

كل مااتصل فيك صبح وليل تشكي لي
من عوج الاوضاع والدنيا ومتاعبـــها

مليت يا صاحبي مابيك تحكي لي
هالأسطوانه أنا مليـت مطـــربها

حتى خيالك بتـال الليل ياتي لي
جروح وعيون معقوده حــواجبـها

عيشتني بعالم ماهو على جيلي
زهرة شبابي حرام انك تخربــها

ياما هجرتك ولا كملّت ترحيــلي
حبايب ما تــــعبر عن حبايبـــها

حبيبتك ما تحمــّل هالبـــهاذيلي
إضحك معاها ولاطفها ولاعبـــها

هيّا تغزل وغن وزيـــد تدليـــــلي
البنـــت يــــاحبها للي يداعبــــها

قلي وش رايك بفستاني ومنديلي؟
الوانهن تعجبك .. أو مانت راغبها؟

وقلي وش رايك بعقدي مع خلاخيلي؟
وشف قذلتي يوم قصينا ذوايبـها

وقلي وش رايك بأطباعي وأقاويلي
لاحظ عليها وغيّـرها وشطّبـــها

خل بيننا انقاش وعلوم وتعاليلي
وآمر على البنت وان حبيت طالبها

يامدمن الهم كافي دمع بالليلي
بكره تشبع من الدنيا ومصايبها

دنياك والله .. ماتسوى التزاعيلي
حتى ولاهيب كفو الي يعاتبها