ديوان ضيدان بن قضعان

هزك الشوق

هيه يالي اغراك الليل واغراك النديم
هيه يالي هزك الشوق والمسرى ضياع

وقفي بين الخطأ والصراط المستقيم
وقفي بين التراحيب وكفوف الوداع

سولفي مثل المشاريه في صوت الحشيم
واسكتي مثل الشفايف لاطاح القناع

واضحكي مثل النواويير في روضة خريم
واغربي مثل المزاجات في غرب الرفاع

وابعدي مثل المتاهات في حلم اليتيم
واقربي بين السوالف وكتفي والذراع

وانظري لي نظرة الشوق للشي القديم
واغرقي بالدمع الازرق مضاليل وساع

واصبري مثل المسافات في صبر الحليم
واسمعي صوت الهوى يوم فليت الشراع

يوم صرتي عود ريحان ورضاي النسيم
واصبري يانجمة الصبح مال الصبح داع

قد طلبت الله وانا بين زمزم والحطيم
شوفتك ياغلا سميه لاصرتي رباع

العيون تجوع تجوع والله العظيم
والعشى في عيونك السود وعيوني جياع

ان عطيتي مايرد الكريم الا الئيم
وان بخلتي قلت تكفيني والدنيا متاع

اقبلي يامثل التباشير في وجه الكريم
وارحلي مثل التعازي على موت الشجاع

هبايب نجد


ذعذعي ياهبايب نجد لاطاب نوم السالي
وانعشيني بريح من ربى نجد للشرقيه

رحمة الله نسناسك على غترتي وعقالي
كأنه الوصل والبيد شهباء والدير محميه

مرحبا ياهبايب ياهلا وانخطر في بالي
صاحب ٍ مانساني مرحبا بابه على طاريه

يحسبني نسيته وانجلى همي وغربالي
واثرني مانسيت الي سبأ بالهوى عانيه

وكل ماهب نسناس الغلا من ديار الغالي
هب في القلب من ريح الصبا عبرة نجديه

وانجحدت الدموع من الملأ آه وعزالي
وان غشتني دموعي نعنب الحب والحنيه

والله اني صبور والبلاء ياصرايم حالي
لاتذكرت دمع ماغبا لو جحدت راعيه

واحدماجحد حبه ولا شمت العذالي
جاهر بالغلا حلوالنبأ من صفاة النيه

كان ماله سوى تاج الحلا واسم جد وخالي
وصار بلقيس وفي وادي سبأ والحشى واديه

وله جموع تنادي بالولاء من تخدته والي
وله خفوق حماه من الظماء واحرمه وسميه

ولي عيون تحدى وتخلى من كراه حالي
كأنه تقول للنوم تهبا منت كفؤ ليه

غلق الصبر والصدر امتلاء بالغلا وامالي
شتتها رياح الاقرباء والسنين معيه

علتي علتي والمبتلاء لاجفاه البالي
ماله الا حصانه لو كباه في نهار الحيّه

سامح الله خبلي لو سلا عن ربيع وصالي
وسامح الله قلبي يوم اباء يندفن في حيه

ووسامح الله هبوب بالغلا من ديار الغالي
ذعذعت لين ذعذعت الصبا عبرة نجديه

فمان الله

فمان الله ياول من سكن بين الضلوع العوج
عسى دربك سفير وعسى الله مايخلني

توكل لاتوادع عسى درب الجفأ المسهوج
يصادف درب فرقى عقب هامة تلمحك عيني

سمحت من الهوى ومن القصيد ومن زراق الموج
رميت اغلا مجاديف الغرام وجيت بإيدني

ابغرق في عذابك لارحلت يصبح المنتوج
قصيد في حياتي سلوتي وإن مت يرثيني

وإذا هبن بنات الريح للذكرى بدون سروج
ابسرج مهرةالنسيان وابرحل من عنوايني

وابنسى الين اسج وابرسل الونات فوجوفوج
وابنسى دمع عيني الي ينتثر وانساك من حيني

صبور ايه والله اني ماثنيت العزم قبل ادوج
برضاني الجفا ورمال وصلك لين تسقيني

شجاع ايه والله اني ماعرفت الذل قبل اسوج
قدم رجلي على درب لبيت اهلك يدوديني

كريم ايه والله اني ماعرفت الشح قبل تروج
دموعي في عيوني ثم اشح بحسرتي فيني

احبك حسبي الله ليت مالك في سمائي بروج
ولالك في البسيطه كود شئ بينك وبيني

دخيلك لاتفلت رح بفالك واترك المرجوج
ترى انا مابقى لك الا انا ماعاد يمديني

فمان الله سق ركبك على درب السنين العوج
لكن طالبك بيت عمي لا تخليه

يا صغير

ياصغير لاتضيعني بنظرات البراءه
وانت ماتعرف مدى تاثير نظراتك بحالي

آه يالبيه يابشويش ياهدئ الاضاءه
للجفون الي من اجفى له يجفني ظلالي

فزبسم الله عليك من المبره للاساءه
وارقد امن في عيوني واسهر امن في خيالي

ياصغير والذكي مثلي اذا خانه ذكائه
ماله الا يعشقك ويصير لعيونك شمالي

وإن فديتك وانت حر من الف باءه لين ياءه
ماعطاني الا الله اسرف واستبيح ولاتبالي

سوى مايرضى غرورك وأد ماتهوى اداءه
انشحى لك بيت حاتم وانت غالي عند غالي

قم تمخطر بالحشى وانسى القراءه والكتابه
وحل واجب شاعر ماحلته سود الليالي

وعلمه وشلون تتعدى على خط استوائه
وعلمه وشلون وكيف وهل يضيعون الرجالي

وكيف يجني خلف سور الجامعه ذنب الكفائه
ساعة اناده ابليس وقاله مالك ومالي

وانت يشفع لك صغر سنك و نظرات البراءه
في رحالي كل مالديت يمي بالرحالي

يا بحر جده


حزين والله اني حزين وخاطري مكسور
لو اضحك واتظاهر بالسعاده يابحر جده

وانا يا بحر يوم اصد واخفى دمعتي معذور
لك الله يابحر صدت والصده هي الصده

اخاف تقول عني يابحر ضيدان بن منصور
في يوم من الايام ودموعه على خده

وانا مابن حي الله بشر يكشف لك المستور
انا رجل يموت ولادرت الامواج عن سده

و لاقاف ماقف ماهوب قدي لاطغى المغرور
انا قد الكلام وماقفي قدي وانا قده

و اباقف وابتسم لواني حزين وخاطري مكسور
الين الله يفرجها علينا يابحر جده

يا عظيمه

ياعظيمه كل شئ له حدود وله نهايه
لكن انتي ماوقفتي عند حدك ياعظيمه

استلذتي بطعناتي واخذتيها هوايه
كن مالك حرة توجع وطعنات ٍ اليمه

آه ليتك ماتماديت بطعنات البدايه
لين صار لكل طعنه في الحشى معني وقيمه

الله يبيحك ولكن كيف في اغرب روايه
تكتبين الحب كذبه والهوى دقه قديمه

وانتي الي كل مالدة عيونك في المرايه
مالحمتي لليتم الي خذت قلبه يتيمه

واليتيمه في اليتامي ماهل حق الوصايه
الوصيه عودها الغض وناياها السليمه

لكن انتي صار لك حق الوصايه والولايه
واستبديتي واضحو البدو واضحيتي مقيمه

مارحلتي لين حطمتي بمافيه الكفايه
عاقل حب الجنون وصوت ناره في هشيمه

استبحتي حرمة المجنون بإدراك وعنايه
والتفيتي له بعقلك وارتكزتي في صميمه

امتلكتي غايته لو ماكان لك غايه
وانتصرتي في عيونه واعترف لك بالهزيمه

من كثر مايعشقك ماقال لك بالحب رايه
خايف الايام لاتطلع عواقبها وخيمه

البارحه


البارحه راسي تصافق طواريه
والنوم ماله يمة العين حروه

يلعب راسي صوت صلف المشاريه
ذيب عوى يبغى عشى امه الجروه

وانا على الدنيا من الهاه للهيه
ماهمني شهرة ولا جمع ثروه

همي وغمي واحد يوم القيه
كني عليل وشوفته محو قروه

تل قلبي في الهوى من عروايه
رشاد الون ثلاثين عروه

يتله الي حامي القيض حاديه
يسقيه هبل مارعاه كروه

عشر شريده كثرها من غواليه
اقفن كما يقفى مع الجمع مروه

والي يبقى عشر وصاته من ابيه
من دونه لو يصيح الصدر ثروه

قلته وكلي ماء ينضح بما فيه
وفي العمر يوم لو يبلغ العز ذروه

واليوم هذا يا اوله وين تاليه
والنوم ماله يمة العين حروه

صفحات الشقاء


يلي على وجهي قريتي كل صفحات الشقى
اقري وأنا باكتب قصيدة واشعل الساحة حريق

باقي كثر ما راح واللي راح نصف اللي بقى
وان ماوصلت لغايتي باموت في نصف الطريق

يابنت يوم امطر غلاك بقلب ضيدان وسقى
تدرين وش سبة شقاه وسبة الجرح العميق ؟

شقاه من يمناه واسم الشيخ والنفس امحقى
والجرح منك ياأعذب العذبات يالموت الرقيق

يا بنت ما دام البدو تخلف هقاوي من هقى
وانا بدوي مني يشيل من الزمن ما لا يطيق

ابفتخر حنا بدو نعشق على وضح النقا
حنا بدو فينا الولد للقمة العليا عشيق

حنا بدو فينا الولد لو شاف موته ماأتقى
حنا بدو فينا الولد يرقا ولو ماله رفيق

حنا بدو فينا الولد لا من رقا رقا رقا
الين يوصل غايته لو كان في قمة طويق

يابنت جيتك والثمن عمري ابي ليلةٍ لقا
يما كذا والا بلاش من الصداقة والصديق

وساعة تبسمتي وشفت الجمر والثلج اصدقا
قلت أشهد أن الموت حق وصحت لك صيحة غريق

واعتقت دمعي والزعل والحزن لرضاك أعتقا
وأغفت عيوني في عيونك ياعساها ما تفيق

وامنت باللي سخرك تقرين صفحات الشقا
واشعلت بردي في دفاك وشبت الساحة حريق

يا وجودي

ياوجودي كل ماهب نسناس الشمال
وجد من حدّه زمانه على اللي ما يبيه

وياوجودي كل مااغفيت ثم مال الظلال
لاغفت عيني ولاذقت شيٍ مشتهيه

وجد من قفّى وهو في رجا كلمة تعال
والتفت من عقب مااقفى ولحدن لدّ فيه

وياعذابي لادنا الليل من روس الجبال
وانتهى يومٍ من العمر ماعاد ارتجيه

وانتي ابعد من سما الحلم ووصالك محال
يابعد من هلّ دمعي ضحى الفرقا عليه

ياغناتي لاتحسبين دمعي يوم سال
ضعف والاّ خوف والاّ كذا والاّ كذيه

والله اني من رجالٍ يضدون الرجال
لكن الحظ الردي ساق دمعي كلبيه

ووالله اني كل مادار حوليك الجدال
قمت كن الموت يشر على قبري يإيديه

ووالله ان قد لي وانا اصد لاجالك مجال
صدّت اللي لاتضايق تذّكر قبر اخيه

ومن سألني قلت مدري واذا عاد السؤال
قلتله تكفى سؤالك ترى ماهو وجيه

وش تبيني اقول عماََ ترى ذبحي حلال
والخطا منها علي صرت احبه واهويه

عذرها لو ماتعذر مثل واضرب مثال
واحدن مايعرف الحر الأشقر يشتويه

وان رجعنا للتواصيف لله الكمال
لا انتهى ليل المزايين جاتك تبتديه

كنها غفلٍ مع البدو طاويها الحيال
ما يميز وصفها الاّ نبيهٍ من نبيه

واهني اللي وصلها وذاق امن الزلال
رشفةٍ مع غفلة الناس من فيها لفيه

واعزتي للي سواتي عشق ما لا يطال
ويوم طاله ضيع الحلم بين أمه و ابيه

يااول احلام الطفوله على حد الخيال
الرجا بللي حمى البيت من حملة بريه

حال دونك سيف عنتر وتاسع حول حال
باثر حولٍ حال دونك وانا ادعي هيه هيه

هيه يللي غرك الحسن واطغاك الجمال
والله ان اموت ماشفت لاوصافك شبيه

لو يسام الحسن والتيه بجنيه وريال
مابقى في سوق غيرك لا ريال ولاجنيه

كيف اهدك للمقابيل وانتي راس مال
راس مال ومال والماال مايعطى السفيه

حافظك حفظي لعيني ورمشي لك جلال
وانتي تشحّين بالما وانا شفّي مويه

شايفن ظلمك وساكت وطال الليل طال
لاتركتي طعن قلبي وانا ماقلت ليه ؟

لو بقا للهيل صبرن على فوح الدلال
مابقى للقلب صبرن على شيٍ يجيه

كنت احسب ان الغلا زال واثره لايزال
في الحشا ماكنه الا دخيلٍ في وجيه

ساقني حبك على الموت وسنيني هزال
والظروف اقسى من الظلم للعرض النزيه

وانتي تسوقين عقلي على حد الهبال
تحسبين ان من بغى شي يقدر يشتريه

والاّ انا ياوجد حالي وجودن مايقال
وجد من ضحى بغاليه لرضا والديه

وياوجودي يااول العمر قبل ألبس عقال
وجد من باع آآخر العمر في رغبة ذويه

وياوجودي كل ماهب صوتش من شمال
وجد من حدّه زمانه على اللي مايبيه

الأبراج


الدلو والميـزان والقـوس والحـوت
ماغير برج العـاج تغـري وصوفـه

وبرج بقلبـي بـرج لولـو وياقـوت
لا يـا بعـد بـرج الحمـام ورفوفـه

ما يسكنه غيرك من السيـف للكـوت
لو ينتحي راس الولـد عـن كتوفـه

علـم وكيـد بالمواثـيـق مثـبـوت
ما هـو عـذر اللـي يفـرك كفوفـه

والله لا سافر لك لـو ارجـع بتابـوت
وانا من اللي ما ربـوا فـي مروفـه

على الشقا لاع الهـوى كـل شفلـوت
وانتـي تلوعيـن الحشـا بالطروفـه

والوقـت للجاحـظ والايـام هـاروت
والقلب حاتم وانتـي اغلـى ضيوفـه

يا مرحبا ترحيبـة عقـاب يـا نـوت
والحـي يلحـق لـو تحـده ظروفـه

صوتك يكفيني عن الشـرب والقـوت
وشوفـك غناتـي والحيـاه مخلوفـه

يااقوى من اللوعات واسخف من التوت
وابلغ مـن البيـت الاخيـر وحروفـه

رجـل تنادينـه ولا يسمـع الصـوت
خسـارة سمعـه وصوتـه وشـوفـه

ورجل يضمك بيـن اياديـه ويمـوت
والله مـا يلحـق حياتـه حسـوفـه