ديوان خليل الشبرمي

في مراكش وانقـره

في مراكش وانقـره والقاهـره واللاذقيـه
حسنها ماشفت مثله جل خلق اللي خلقهـا
ولا هقيت انه بقى للزيـن فالدنيـا بقيـه
الله اللي عن جميع الناس والعالـم فرقهـا
الرموش جيوش صفت واللواحـظ بندقيـه
الله اكبر ( بندق الخياط ) مايخطي تفقهـا
والله اني من ثمان سنين وعيونـي شقيـه
ودوحة احلامي رياح الياس قد حتت ورقها
ياعرب مجنون فيهـا والقضيـه منطقيـه
زينها شيٍ عجيب ولايلام اللـي عشقهـا
حبها في وسط قلبي لـه مكانـه واسبقيـه
وفي عيوني بالجمال وبالحلا ماحدٍ سبقهـا
والهوى دامه عفيف ونيتـي بيضـا نقيـه
ما التفت للوم واذني عن كلام الناس صقها

اتركينـي

اتركينـي يـا عزيـزة للشتـات
والعنـا والبعـد والليـل الطويـل
وريحيني من غمـوض المفـردات
وكبرياء الكذب والعـذر الهزيـل
وحاصريني صمت من كل الجهات
واذبحيني بوح فـي نبـرة عليـل
واسألي غـدر اليديـن الناعمـات
عن ثلاث طعون في صدر القتيـل
وافرحي لاقيـل فارقـت الحيـاة
وزغردي لاشيعـوا جثـة خليـل
وكل شيٍ بيننـا يـا بنـت مـات
ولابقى بعد الرحيـل الا الرحيـل
وانتهت رحلـة ثمـان الطايـرات
وابتدت قصـة لقانـا المستحيـل
كنتِ أجمل من رأيت من البنـات
ومالـك بعينـي مثيـل ولا بديـل
وصرتِ أشنع جرح وأبشع ذكريات
للأنانـيـة ونـكـران الجمـيـل
ولا تبقى من غـلاك إلا الرفـات
ولا تلاشى من عنـاي إلا القليـل
ودعيني يوم فقـت مـن السبـات
ولا تعديني سـوى عابـر سبيـل
اقترف في حـق نفسـه سيئـات
ولا يكفرها سوى البعـد الطويـل

يقول الشاعر خليل ::

أعطاني أحد الإخوان ورقة فيها ثمانية أبيات موجهة إليّ ،
ولكن الغريب هو أن هذه الأبيات الثمانية فيها اختلاف ،
فالأربعة الأولى قوية وموزونة ، أما الأربعة الأخيرة
فعلى العكس تماماً ، وبالذات الأبيات التي ذكر فيها اسمي ،
فقلت لأخي الذي وجهها إليّ ، هذه الأبيات إما أن الذي كتبها اثنان ،
أو أنها كانت موجهة لشخص آخر ، ثم عُدّلت ووجهت لي ،
وهذا ليس هو المهم ، المهم هو أن مضمون تلك الأبيات
أن الناس تتكلم والناس تقول والناس قالت وووو ،
بالإضافة إلى بعض التهم الموجهة إلىّ ،
وقد حاولت التهرب من الرد لكنه أصر على ذلك ،
وحقيقةً أبياته لاتحضرني الآن ، وليست مسجلة عندي ،
ولا أذكر إلا ( المشد ) ، يقول ::





الا يا قلم سر بالهواجيس سجل لي بيوتٍ دفعها هيض فكري على بالي


وهذا ردي عليه :


ألا مرحبـاً واهـلاً هـلا عـد ماهلـي
سحابٍ على سلمـى واجـا دوم همالـي
وحي الرفيق اللي علومـه يجـوزٍ لّـي
وحي الكتاب كتاب غالي ومـن غالـي
ولاوالله الا مرحبـاً بالرفـيـق الـلّـي
مضرا على كسـب النواميـس ريبالـي
مديـم حجاجـه طلـق ولسانـه يهلّـي
به الطيب طبع معرب الجـد والخالـي
صديقٍ صدوقٍ صادق الود صافـيٍ لّـي
نقـيٍ تقـيٍ مالـه اجنـاس وامثـالـي
ومن بعد ذا يااحمد ابا ارسـل وحوّلـي
وشرواك ذيبٍ موجتـه تلقـط ارسالـي
انا يالحميدي عان وسمـي علـى بلّـي
علام الوسوم اللي علـى بلّـك اشكالـي
وش اللي جرى وايش السبب يافتى قلّـي
علام العلوم علـوم جـزلات وهزالـي
لاصرت فوقي ماانت ملزوم تنـزل لّـي
ولاصرت حدري ماانت مكلوف ترقى لي
وكانك تقول النـاس قالـت فعيـن لّـي
من اللي سلم من راعي القيـل والقالـي
ولاتبعد ابدن بـس مـن ملّـك وملّـي
تحسـس ودوّر كـم حقـودٍ ومحتالـي
بلانـا بـلانـا بينـنـا دوم ينسـلّـي
ومنـا بنـا واشيـن ورخـوم وانذالـي
وبالناس يابن النـاس طامـن ومتعلّـي
وانا ما ارفع الطامن ولا اطمن العالـي
وقلبي دليلـي يالحميـدي يدربـل لّـي
واميز هماجه قبل اذوقـه مـن الحالـي
وانا احَمْد ربي ماخبـرت القـدم زلّـي
ومشيي لـك الله دوم دغـري وطوالـي
ونفسـي عزيـزه بالـردى ماتسولّـي
وسود النوايـا ماتشـوش علـى بالـي
ولا اداني العيلـه ولا الميـل لـو ملّـي
ولا اطفف لغيـري ولا ازيـد مكيالـي
وانا داري انك يافتى الجود وافـيٍ لّـي
ولاهي غريبـه منـك ياطيـب الفالـي
وعلى كل حالٍ جيت كلي علـى حلّـي
وخذني شقيقٍ لك على كل ابـو حالـي
أبلبس علـى ماتشتهيـه انـت فصّلّـي
وضبّط عسـى الله مايعريـك تفصالـي
وقل واهني اللي عـن النـاس متسلّـي
دليـخٍ فضيـخٍ دالـهٍ خالـيٍ سـالـي
وصلوا على سيْد البشـر عـدّ ماهلّـي
سحابٍ توالـى نـوض براقـه يلالـي

لاوالله الا


لاوالله الا .. لاتجي والعلـم خـذ علـمٍ وكـاد
حبك تلاشى وانتهى .. والافضل انـك ماتعـود
لالاتحـاول مابقـى .. فالقلـب لـك ذرة وداد
ياللي رحلت وكن مالي بالوجـود ايـة وجـود
ماينفـع التسديـد لافاتـت مواعيـد الـسـداد
قطّع فواتير الوفا .. واحـرق ملفـات الوعـود
ماهي علـوم السندبـاد وشهريـار وشهـرزاد
ما للجحود اليوم عندي ياجحـود الا الجحـود
امشي على وضح النقا المجرود واحب الحيـاد
ولا اداني انصاف الحلول ابدن ولا اخون العهود
صابر على ضيم الدهر واجاهد ايامـي جهـاد
والعمر ينقص والليال السـود ماتنقـص تـزود
من معركتْك ابنسحب واسحب جنودي والعتـاد
ولانسحاب احياناً ارحم مـن معانـاة الصمـود
ولايندمل جرح البياض اليا دنـا منـه السـواد
ولاتطيب العله اللي بيـن بيـض وبيـن سـود
كنت اتبعك حافي قدم وامشي على جمر وكـداد
سلك الحرير يقودني ويسوقنـي ذعـذاع نـود
وتعبت انادي ياحياة الـروح يـا كـل المـراد
ومليت اقول اليوم والا باكـر بوصلـك تجـود
انشد مجاهيم الليالي فـي ربيـع وفـي جمـاد
ياما علشانك سهـرت الليـل والعالـم رقـود
اسهر على ذكراك وعيوني مطاولهـا السهـاد
وسهيل والويل وسـواد الليـل ياظالـم شهـود
صدك ذبحني والجفـا قطّـع معاليـق الفـؤاد
ياللي بتعذيبـي تماديـت وتجـاوزت الحـدود
حتي عصافير الوله فالصدر من جـور البعـاد
ماتت على هدف الضلوع اتردد الحان الخلـود
وحتى الرسايل لاجتك مـن كبريائـك والعنـاد
صارت جنايز والظروف اكفان ودروجك لحود
عذّبت قلبي واضطهدت الشوق بالهجر اضطهاد
لين الغلا مات ودفنته فـي جراهيـد الصـدود
لالا تبرر موقفك واعلن علـى الحـب الحـداد
وترى البكا ماينفع الميّـت ولا لطـم الخـدود
الحـب شـوق وجاذبيـه وانقيـاد بـلا قيـاد
وصدق و وفا واخذ وعطا ماله حدود ولا قيـود
وكلن على ما قيل يلقى مازرع يـوم الحصـاد
واكيد من من تزرع يمينه شوك ما يقطف ورود
واليوم لامنك بغيـت العلـم خـذ علـمٍ وكـاد
حبك تلاشى وانتهى وان طعت شوري ماتعـود

أغسطـس آب

لا ياحمـد لاتبحـث الأسـبـاب
والوقـت لا تـامـن عواقيـبـه
وان كانهـا تحقيـق واستجـواب
سجّـل ودوّن كـل مادلـي بــه
الحـب بلـوى والهـوى غـلاب
وويـل مـن طــب بغياهيـبـه
وياوالله اللـي ماحسبـت حسـاب
رجلي طريق الحـب تمشـي بـه
وانا ادري ان الحب حرب اعصاب
والمسعد اللي سَلْم مـا بلـي بـه
ليمـا بليـت بمتـرفٍ جــذاب
ماغير اهوجس به واهـذري بـه
غـروٍ لـك الله يسلـب الألبـاب
بالسلهمـة والمـلـح والطيـبـه
ماكنـه الا والـغـزال اقــراب
مـن دون لاشــكٍ ولا ريـبـه
عاشق عيونـه فـي عيونـه ذاب
ذوب الذهب وان سلهم غـدي بـه
رمشـه كتيبـه والعيـون كتـاب
تاصـلـك لاسلـكـي مكاتيـبـه
شلفا ذيـاب وفـي يميـن ذيـاب
ياعنـك مايبـرى مـن تصيـبـه
تصوب العاشـق بعكـش اهـداب
وبنظـره توديـه وتـجـي بــه
أهـواه واهـوى ليلـه المنسـاب
واسري معه واضيع واسـري بـه
واهيـم وادخـل جـوه الخـلاب
واطرب واغني لـه واغنـي بـه
واعيـش جـو انشـودة السيـاب
واغيب واصحي به ولا اصحي به
وان مـر طيفـه سيّـد الأحبـاب
وانـا بنومـي قمـت اهلـي بـه
افـز بـه وافـز لـه باعـجـاب
ضيـفٍ تهلـي بــه معازيـبـه
لاوعـي لاتمييـز لا استيـعـاب
الزين ماسمع به ولا اوحـي بـه
عاشق عيونـه ياحمـد منصـاب
والموت كانه مـات مـادري بـه
يادمعتيـن ونظرتـيـن عـتـاب
للجـادل اللـي صـده مصيـبـه
أتلى العهَد به فـي أغسطـس آب
الفيـن وخمسـه ذاك علمـي بـه
أسهر وقلبي ياحمـد مـن غـاب
والهـم يقبـل بـه ويقفـي بــه
ابـا اتمنـى والبخـت جــلاب
يالله عسـى الاقـدار تومـي بـه
يلملـم شتـات الهايـب المرتـاب
ويبعـثـره ويعـيـد ترتـيـبـه
ويمد لي من بعـد طـول غيـاب
فنجـال واقـدع مـن مذانيـبـه

من سبا عقلي

من سبا عقلي وقلبـي مـن سبـاه
مستحيل انسـاه هـذا المستحيـل
يوسفي الحسن تـوه فـي صبـاه
ناشنـي بالعيـن واردانـي قتيـل
ماحبـا ربـي لـحـيٍ ماحـبـاه
بالحلابيـن المـلا مالـه مثـيـل
لامشى المجمـول تزهـاه العبـاه
غصن موزٍ ناشتـه نسمـة عليـل
ولاسمعت أصلي ولا اعذب من نباه
والجبين الشمس والليـل الجديـل
اكتبوا له (ياحمـد) لفـت انتبـاه
يدرك اللي من سهم طرفـه عليـل
وكان حبـي فيـه لبـسٍ واشتبـاه
دوك مهج القلـب برهـان ودليـل
و(ياحمد) قـل لقربانـا وأقربـاه
ياعرب ذا البنـت لاتذبـح خليـل
مانبـا غيـره وغيـره مانـبـاه
ولانـدور بالغوانـي لـه بـديـل
واشهد إن الحب عـدٍ مـن جبـاه
نزعب الليعـات والدمعـة تسيـل

واونتاه اللـي مـن العـام للحيـن


واونتاه اللـي مـن العـام للحيـن
وافوح كبدي.. وآآآآه.. وعزتالـي

وابري حالي كل ما قلـت بتزيـن
عيت تزين وصحت وابري حالـي

البارحة مامسيت والناس ممسيـن
عيني قزت والقلب يصلاه صالـي

يرجف ورجفه كنه عيار خمسيـن
مع هيلعٍ عنـد اللقـا مـا يبالـي

وانس بكبدي مثل طعن السكاكيـن
ولا حدٍ فطن ياخوك للـي جرالـي

تخالفـن ياخـوك كـل الموازيـن
والحمـل كايـد واحتملتـه لحالـي

ان اشهد ان الموت ضيم المواليـن
والغدر امره مـن رفيـقٍ موالـي

والخدش كبه لو رصيـده ملاييـن
وانص الولد لو ما بجيبـه ريالـي

تمقلـي ياعيـن دامـك تشوفيـن
وتوكـدي حــرام والا حـلالـي

السيل سال وشال روس وكراعيـن
والله يثبـت راسيـات الجبـالـي

وحنا على درب المقاديـر ماشيـن
ولا حدٍ درى عن غيب سود الليالي

يا من ترى وتشوف وتروف وتعين
أبطلبـك يامـن عليـك اتكـالـي

أنك علـى درب السلامـة تقديـن
وتلطف بحالي يا عزيـز الجلالـي

الليالـي تـوْدِع العاقـل

الليالـي تـوْدِع العاقـل هبـيـل
والامـور اليـوم سلّـم ياسـلام

راح جيل ومقبـلٍ ياخـوك جيـل
يالله اني طالبـك حسـن الختـام

العزيـز يـذل ويعـز الذلـيـل
والسباع تباع فـي سـوق النعـام

ودفتر الشيكات في مخبا البخيـل
ماظهر في حرب والا في سـلام

واللبن والزبد في بطـن الصميـل
ما اطعم الجايع ولا فطـر صيـام

وش يجيب (الدوم) لغروس النخيل
فرقهن فرق الكـرام مـن اللئـام

ومن جلب لاهل الحسا تمرٍ حويل
علمـوه ان الهزيـلـه ماتـسـام

حسبنا المولى وهو نعـم الوكيـل
عالـم النيـات خـلاق الأنــام

مانبـي منهـم كثيـر ولا قليـل
ولا لنا مقصـد ولا غايـة مـرام

والحظيظ اللي يحسّـب للرحيـل
باكر ليا لف فـي متريـن خـام

مايفيـده لا خـوي ولا زمـيـل
ولايفيـده لاخــوال ولاعـمـام

فانيـه والادمـي عابـر سبـيـل
اترك اللي فات وانظـر للأمـام

والمهايط والحكـي مالـه ذبيـل
مارفـع طامـن ولاطمـن سنـام

والشعير يكـال بشـوال و زبيـل
والذهب محسوب بالملـي جـرام

والكلام احيان احد مـن الصقيـل
يتلـف الارواح ويقـص العظـام

والصبر طيب لـو انـه حنظليـل
والعفو والصفح من طبع الكـرام

استغلوا فرصة الشهـر الفضيـل
افتحوا صفحة محبـه وانسجـام

قالهافي اجتماع بني تميم في حوطة بني تميم وفي ضيافة

الشيخ / حسن بن إبراهيم آل حوتان التميمي

يوم الخميس ليلة الجمعة الموافق 6 من شوال 1425هـ

ذروة تميم

بديت بسم السميع الواحد اللـي بالسرايـر عليـم
الحي محيي هشيم الصفصف القاع ورميم العظام

اللي دحر بالبحر فرعون وجنوده واعـز الكليـم
وانطق لسان ابن مريم بالمهَد عيسى عليه السـلام

يارب لطفك وحلمك ياحليـم ورحمتـك يارحيـم
والعفو والستر والغفران ياغافـر ذنـوب الانـام

ومن بعد ذا مرحباً واهلاً هلا ماهل همـال ديـم
وعداد مالاح برق وسومها بخشوم سـود الغمـام

عند البنيخي هل الحوطه هل المجد القديم العظيـم
واهل القويع وهل الحلوه زحازيح الرجال الكرام

رمز الكرم والصخا والطيب والطولات ذروة تميم
أهل الوفا والظفر والباس لاثار الدخن والعسـام

أهل الندا والنقا فرز الوغا ومنزحيـن الخصيـم
دون الغروس الظليله والحما محمي بحد الحسـام

عوق العدا والمنايا يـاردون حياضهـا ورد هيـم
وجيوش الاتراك تشهد يوم ولّت والمدافع حطـام

وانتم هل الدين وانصار الشريعة والهدى من قديم
وانتم حماة العقيدة قالهـا الامـام نسـل الامـام

والحمد للواحد اللي لاوهب يجزل وان اعطا كريم
تميم من روسيا لاسبانيا في عز واشـرف مقـام

وكل القبايل علـى ماقيـل فيهـا حقهـا يافهيـم
كلمة وفا والوفا لاهل الوفا فرضٍ وتركه حـرام

وعداد ماعاد عيد وعدّ مـا هـز الجرايـد نسيـم
على النبيّ الأبيّ الهاشميّ ازكى صـلاة وسـلام

مقتطفات لخليل الشبرمي




( 1 )

بديت بسم الله اللي لادعته الناس لبـى واجـاب
ربٍ عطوفٍ يشوف ظروفها ويـروف بحوالهـا
أوي الله الله وسيع المغرفه .. والله شديد العقاب
سبحانه مقسّم ارزاق البشـر ومقـدّر آجالهـا



( 2 )

رجواي باللي عليـه المتكـل والاعتمـادي
وماخاب عبد(ن) على رب المخاليق اعتماده
رحيم يحيي هشيم القاع من وبل الغـوادي
وحكيم فيما حكـم واراد لـه حكمـه واراده
سبحانه اللي رفع سبع السموات الشـدادي
اللي دحر بالبحر فرعون وجنـوده وابـاده



( 3 )



ويلك من الله تماديت يا اسمـر يـا نحيـل
وش جرى لي من سبايبك من شهر اثنعـش
ذا وحبك ساكـن(ن) فـي معاليقـي نزيـل
معشش(ن) بالقلب من يوم عمرك بالطعـش
حالف(ن) ما انسى ولا اسلى غرامك يا جميل
لين اودّع دنيتـي ميـت(ن) فـوق النعـش


( 4 )

يازين انا من ثمان سنين
مجنون يازيـن بعيونـك
والشاهد الله الى ذا الحين
لازلـت لليـوم مجنونـك
خفّف على قلبي المسكين
وارفق على قلب مظنونك
ماهو بحبحب على السكين
اطعن ولكن على هونـك


( 5 )

البوم ينزل بالخرابـه والقليـب
وطيور شلوى عالي(ن) منزالها
والحق حق ودوم شمسه ماتغيب
والمخزيه خزي(ن) على عمّالها
لاتامن الدنيا تطيب ولا تطيـب
ما تنومـن باقفاياهـا واقبالهـا


( 6 )

من زود مابي يالغضي ترخت
يوم الوعد هجـري وميـلادي
ومن لهفتي ياسيّـدي دوخـت
رزنامتـي ياثالـث اعيـادي
لاشك ما ادري وش بلاك افخت
ياباشـة الغـزلان ميـعـادي
يا حيلة الله فـي رداة البخـت
حظي معك بالوصل ماجـادي
الله يجيبك يا غـرور اليخـت
الموج ماهو دايـم(ن) هـادي


( 7 )

الوصل طاعه والقطاعه جريمـه
سنة محمد في صحيح البخـاري
ومن لايميز صاحبه من خصيمه
لابد عينـه مـا تهـل العبـاري
والجود له بوجيه الاجواد سيمـه
والشر مثله بالعرب له مـواري
والحر يفهـم والبهيمـه بهيمـه
والاصلي اصلي والتجاري تجاري


( 8 )

لا والله الا دورت الوقت دارت
وصرنا بديره والحبايب بديـره
والحزن خيّم والسعاده تـوارت
واوضاعنا بالحيل صارتخطيره


( 9 )


ليت فرخ الحمام عصير ما عاد بسجع
نقض جروح قلبي والعنـا والمواجـع
آآآه واحسرتي ياليت ما فات يرجـع
بس ماهو براجع .. بس ماهو براجع


( 10 )

أسير الصمت همه ترجمانه
تبوح بهم واسـرارٍ دفينـه
تشوف بعينه اليسرى ادنـه
وتشوف بعينه اليمنى غبينه
ترى قلبي معك يا بنت امانه
وروحي يا بعد روحي رهينه
وامانه كل شي الا الخيانـه
وخليل الشبرمي لا تذبحينه


( 11 )

هلا والليل هودج يستر العشاق ديجـوره
هلا باللي لفاني من بعيد وفي يده قنديـل
كما بدرٍ تلثم بالسحاب ولا حجب نـوره
ونسناس النسيم ارخى لثامه وابعد المنديل


( 12 )


بع عشرة الاش ببـلاش
لا عاش من عاشـر الاش
من عاشر الاش وش حاش
غيـر الخـزى والرديـه


( 13 )

هني الطير الـى منـه تظايـق فـل جنحانـه
ونحر هام السحاب وفالفضاء فضفض عن شعوره
وعلى عذق شجره وقّع وغرّد باعـذب الحانـه
تقول انه على مسرح وزهر الـروض جمهـوره


( 14 )

انا عقب العنا عيني تهنّت
ومعاناتي مع الايام هانـت
هلا باللي على شاني تعنّت
ولجلي من بعيد ديار عانت


( 15 )

انتِ اول امنياتي في حياتي
يا حياة الروح وانته منتهاها

( 16 )

كلمتي يالمجمول مدري وشنهي
لا اقول مقصوده ولا زلة لسان
والبوق في سلم المحبين منهـي
واكبر جريمه بوق خلان خـلان
شف الحزن والياس برّق بوجهي
شيٍ جرالي ما جرا قط لانسـان


( 17 )


كبرت الشرهات والموقف تطوّر
بيني وبينه وحرب اللوم ثارت
قال لي : تكفى ترفق لا تهـوّر
مايصير وقلت : لا بالله صارت


( 18 )

.... ما يضل ويتبع ابليس اللعين
.... غير شخصً فيه ست من الصفات !!


قل عرف
وقل علم
وقل دين ..

ــــــــــــــــــ

وقل خوف
وضعف نفس
وخبث ذات ..


( 19 )

الكذب ما حـط المماليـك سـادات
ولا حط سرج الخيل فوق الجواميس


( 20 )

يالثريا سامحيني وامحي لي واعذريني
والله اني ما دريت انك بعيده يالثريـا


( 21 )

خليل يقول الا يالله يا سبـوح يـا قـدوس
تسلّمني من الناس وهوى نفسي وشر ابليس
عرفت الناس والدنيا تجارب والزمان دروس
وعرفت ان المذله كلها فالكـذب والتدليـس


( 22 )

لا والله الا ساقنـي وانسقـت
غصبً علي امشي بدون شعور
لا اشّر المجمول بايـة وقـت
امشي وعيني ما تشوف النور

( 23 )

لا تعتقـد انـي دلـوهٍ وسالـيـك
والله فلا اسلا يالغضي لو ثوانـي
دايم على بالـي ولانـي بناسيـك
ومن المحال انساك طول الزماني
اموت واحيا في محبتـك واغليـك
لاشك ما ترحـم وطبعـك انانـي
قطّعـت قلبـي بيّنـاتً مساطيـك
تسعين طعنه بالحشـى والمحانـي
واليوم انا اطلب عالي الشان يهديك
اللي بحبـك يـا حبيبـي بلانـي

( 24 )

كنت انتظر والحال بالحيل مخطور
لازل يـومً قلـت ياتيـك بكـره
أثر الغدر في صاحبي شي مفطور
ومعنى المحبه قاصرٍ عنـه فكـره
الحب ماهو بالمراسيـا وعطـور
الحب داخل بسرة القلـب وكـره

( 25 )

قالو قديـمً مـن تغـلا تخـلا
وانته تغلا بس انا ازريت اخليك
مشكـاي لله داري انـك تغـلا
لاشك قلبي مع تغّليـك يغليـك