ديوان خالد المريخي

يا حلو لثغتها


نور عيني تبعثرني متى ما لفت = وكل الاوراق تتلخبط بشوفتها

لا حضر نورها نور الليالي خفت = ذيك حتى المسا يحسب لطلتها

المشاعر ليا من صادفتها دفت = والاحاسيس تتباشر بجيّتها

أنجذب حيل صوب عيونها لا غفت = تجذب الكون كله جاذبيتها

إن صفا جوها دنياي معها صفت = ما يروّق مزاجي غير ضحكتها

البراءه ليا منا كبرنا اختفت = بس اهي عكسنا زادت براءتها

إن حكت من خجلها دنّقت وارجفت = هذا هالحين وشلون بطفولتها ؟!

كن بلسمها لثغه ليا سولفت = بس يا حلوها ويا حلو لثغتها

جتني قصيده كنها رسم رسام


جتني قصيده كنها رسم رسام = أصيلة وآنا هواي الأصيله

ومن يوم جتني هاجس الشعر حوّام = ومن طيب راعيها نويت احتسي له

لوّ المراجل نعتبرها بالارقام = أنا اشهد انه بياخذ اكبر حصيله

غلام سعد اللي لهم مثله غلام = أشفى غليل ابوه واشفى غليله

وعنده قلم مهو مثل كل الاقلام = محرّم ما يكتب الا الجميله

هو يشتكي لي كل ما صار منضام = وانا على طول ان زعلت اشتكي له

بقول له دامه على الوقت لوّام = الوقت بيدنا ولاباد حيله

ياخوي لا تتعب بتحسيب الاعوام = مافات خلّه واتركه لا تخيله

شفني أنام أحيان واحيان ما نام = أفرح دقايق وانطوي كل ليله

كني شعب بغداد والوقت صدام = ما هو بكيفي غصب قمت انحني له

حملي تقسّم وانقسم عشرة اقسام = حاولت اشيله لكن ازريت اشيله

لمحت لك


ياللي تعيش بهنا = حس بشعوري أنا

لمّحت لك ألف مرة = وانته ولا انته هنا

جيتك وكلي غرام = وسمّعتك أحلا الكلام

وانته ولا ملتفت لي = يا سيدي والله حرام

طولت بالي عليك = لكن تعبت ارتجيك

مدري أبيك وتبيني = أو بس أنا اللي أبيك

ياللي العمر ما كفاك = متى تحس بغلاك ؟

أموت واعرف حبيبي = ايش آخرتها معاك ؟

أنت اللي خسران

أنت اللي خسران يوم انك تزعلني
والا أنا واجد أحبابي وخلاني
ان كان ربي عطاني عمر وامهلني
مصيرك تشوف من يندم على الثاني
بتجاهلك ماهوبس أنت اتجاهلني
عهد علي أني أنسى من تناساني
وأعاملك مثل ماشفتك تعاملني
وان قاله الله وعد ليجيك ماجاني
مسكين حدك اذا مفكر بتشغلني
ماتهز شعره عشان تهز وجداني
كني أشوفك تجي بكره تحايلني
وتقول توبه ماعاد أعودها ثاني
وأقول لك حل عني لاتجادلني
حرمت أنا مايجي لسانك على لساني
دامك بديت اتحداني تحملني
من قال لك ياصغيرون اتحداني

يابو فهد لاصرت تنشد


يابو فهد لاصرت تنشد عن الحال
حالي بها ياخوك عشرين عله
لي صاحب يسوى ثلاثين رجال
كل شهد وانا بعد شاهد له
طيب ....وفي .....كريم في كل الاحوال
ومن عاشره اقسم قسم ما يمله
كنت اتعذر له اذا زل او عال
بيني وبينه ماتجي اي زله
ما كنت اظنه يسمع القيل والقال
الين ماقفى وانا مقبل له
كشر بوجهي واحسبه ضايق البال
واقول في نفسي : مهي عاده له
اثره سمع يابو فهد هرج الانذال
حطوني ابغظته وانا منصح له
واليوم ابيك تحلها وانت حلال
يا سيفي اللي لاتضايقت اسله
يا طيب فعلك يوم اطالع بالافعال
انا اشهد ان اللي يغلك تغله
يابو فهد كن المراجل لك عيال
والطيب كنه عود وانت ولد له
ابيك تنشد وش بلا صاحبي مال
رح وشف وشبه تغير وقل له:
كانه يبيني حاول تحل الاشكال
وكانه مقفي جعلها سفره له

ارفق بحال المريخي

أبطّل دلع يا حبيبي أتـرك أعـذارك
يا شينك أن قمت تتدّلع ويـا زينـك
أنا فضولي بأحاول أكشف أسـرارك
أن ما تكلّمـت يالله عينـي بعينـك
خليت جنّه هلي وأخترت أنا نـارك
وسلّمت نفسي بنفسي وطحت بيدينك
ما أخترت حبّك حبيبي قلبي أختارك
حتى أنا مـا أجـي بينـه وبينـك
عنوانك بمهجتي وضلوعي ديـارك
أرفق بحال المريخي الله لا يهينـك
من كثر ما أخلفت عقلي لعنبو دارك
نسيت انك بقلبـي وأسألـك وينـك

يحلالي

يحلالي الشعر لا شفته ويحلاله
واللي يعجبه يرضى فيه يعجبني

أنا انطرب لا قصدت بردة افعاله
لا قلت شعري وقال : الله يطربني

ما هـــو مع الناس هو هناك بلحاله
ياقصى خفوقي يريحني ويتعبني

الله عطاني غلاه ونعمة اوصــاله
وحبّبه فيني مثــل ما فـــيه حبّبني

ما يجوز له شي مــدري كيف جزناله
انا اشهد اني مشنّص يوم قربني

ولو قالوا الناس : خله مالك وماله
باقول : يجذب ولا ادري كيف يجذبني

ادري مهـــو زين مـــاشيٍ حاله
زينه مهــــو كل هذا .. بس عاجبني

الثريا

لين العود يسعد لي مسا هالليونه
قم تمخطر هناك وقم تمخطر هنيّا

قم تثنى وخل الليل يكسي متونه
حيّ هاك القوام وحي هاك المحيّا

ورّهم كيف تقدر شي ما يقدرونه
علّم اهل الثرى وشلون رقص الثريّا

خلّهم يفقدون العقل ويودعونه
سوّ فيهم سواتك قبل ما اعرفك فيّا

انت يا ويل من جيته بنظره حنونه
اشهد انه بيصفق مثل صفقة يديّا

انت لا تلوم من شافك وطيّر عيونه
انت مفروض من شافك يسوّي كذيّا

تكفون خلووه

تكفون خلّوه لا تحصون غلطاته
انا ادري انه تلف حــــالي وضيعني

وادري سواة العدو ابرك من سواته
بس ان قلبي واعرفه ما يطاوعني

هذاك انا اضيع لا طالت نظراته
بعيونه الســـــود يسمح لي ويمنعني

أحلى عــــلامات فالدنيا علاماته
متّع نظر كـــــل من شافـــــه ومتّعني

خلـّوه يخطي انا راضي بســــيّاته
يخطي بكيـــفه ولكــــن لا يقاطعني

من كثر ما اغليه صرت افرح بزلاته
ولو قلتوا اخطا عليك اقول وش يعني ؟!

خلاني أمشي على كيفه ومشهاته
طوّعني شلون ؟! مدري بس طوّعني