قصيدة : وين الغــلا
جتني تقول اليوم وش عاد لي فيك ياللي تقول انك من الشوق مجروح
تلعب علي بقولتك اني اغليك وين الغلا مادامك اليوم بتروح
ليه المحبّه صارت اخر امانيك ومنوّل ٍ انت اللذي تبني اصروح
تضحك معي في كل درب ٍ اماشيك واليا حصل منك خطا قلت مسموح
ان كان ياممدوح قصّرت انا فيك بيّـن لي التقصير لاتزوّد اجروح
قلت اسمعيني دام انا اليوم مغليك ابغى ابيّـن لك خفاياي بوضوح
ماني بناوي ياحياتي اجافيك بس ّ الظروف اليوم خلّتني أبوح
حطّوا علي ّ اشروط مادمت باغيك صكّوا علي الباب والسر ّ مفضوح
يبغوني ابعد كل عمري ولا اجيك ماهمّهم حزني ولو تطلع الروح
ولو رحت يمّك عند بابك اناديك قالوا تراها تشتكي منك وتنوح
هم يحسبوني بعدها صرت ناسيك وشلون ابنسى من لها القلب مفتوح
عايش على ذكراك والقلب هاويك عشنا سنين العمر في جدّ وامزوح
ياويل قلبي كل ماحل ّ طاريك بان الحزن دمع ٍ على الخدّ مسفوح
واصبحت انا من حبّك ارسمك وأمحيك وارسم خيالك لاسرى الليل وأنوح
اكتب على بيض الورق جملة ٍ فيك وأكتب ورى لا عاش لا عاش ممدوح
ـــــــــــــــــــــــــــــــــ
اخوكم / ممدوح الحيسوني
التسجيل مجاني
ويـن الغـلا
العرض العادي
